كل النصائح

الـ Portfolio والـ Personal Brand بيبدأوا من مشكلة حقيقية

Mohamed Hassan مرشد مهندس أنظمة برمجية · · معدّلة

الـ Portfolio والـ Personal Brand بيبدأوا من مشكلة حقيقية

أكتر سؤال بسمعه من اللي لسه بيبدأ برمجة: "أعمل مشاريع إيه؟ وأجيب الأفكار منين؟"

وغالبًا اللي بيحصل إنه يعمل 15 مشروع من كورسات، ويحطهم كلهم في الـ Portfolio. بس الـ Portfolio مش مخزن لكل اللي عملته، هو مكان لأحسن حاجة بتثبت إنك تقدر تقدم قيمة.

فالحل: ابدأ من مشاكل الناس.

اتكلم مع أصحاب بيزنس، ولو معندكش حد، اسأل اللي حواليك، حتى صاحب المحل اللي على ناصية الشارع. إيه اللي بياخد وقتك؟ إيه المشاكل اللي بتتكرر كل يوم؟ هتلاقي مشكلة تتحل بـ Software أو Automation أو AI.

مش لازم منتج ضخم. المهم يكون حاجة حقيقية بتشتغل، وتوثّق اللي عملته.

وبعدها اعرض النتيجة بالأرقام:

وفّرت كام ساعة؟ قلّلت التكلفة قد إيه؟ إيه اللي كان يدوي وبقى أوتوماتيك؟

كده أنت مش بس عملت مشروع، أنت عملت Case Study تستاهل تتحكي.

وانشر عنها. شارك رحلتك والتحديات والنتايج. ولو مفيش حاجة تنشرها؟ ارجع لأول خطوة.

وهنا بتتكون دايرة:

تسمع مشكلة ← تبني حل ← توثّق ← تنشر ← الناس تعرفك ← تيجيلك مشاكل وفرص جديدة.

وساعات المشكلة اللي بدأت تحلها كمشروع بتتحول لمنتج وبيزنس حقيقي.

فبدل مشروع رقم 16 شبه الـ 15 اللي قبله، دوّر على مشكلة حقيقية، واعمل حاجة تستاهل تتحكي.

مفيدة · 8 4 تعليقات

النقاش

4 تعليقات

اسأل المرشد عن هذه النصيحة أو أضف ما نجح معك. يصل إشعار بكل تعليق إلى المرشد.

انضم إلى النقاش سجّل الدخول لتطرح سؤالًا أو تردّ على بقية الطلاب.
تسجيل الدخول
ترتيب التعليقات
  1. Hamsa Mansour Mohamed

    طيب بالنسبه لو معظم المشاكل اللي قابلتها مع اصحاب البيزنس بالفعل اوريدي ليها Solutions قبل كده ف بقيت محتاره ف افكار ال Problems هل احاول القي حلول تانيه ب طرق تانيه؟

    1. Mohamed Hassan المرشد

      مظبوط، ابدئي بفهم الحلول الموجودة واسألي نفسك: - هل سعرها مناسب للفئة اللي بتستهدفيها؟ - هل سهلة الاستخدام ولا معقدة؟ - هل بتغطي احتياجات العميل فعلًا ولا جزء منها بس؟ - هل مناسبة لطبيعة شغله؟ - هل فيها خطوات كتير ممكن تتبسط أو تتلغي؟ - هل ممكن استخدام تقنيات زي AI يخلّي الحل أسهل أو يقدم قيمة إضافية؟ ممكن تكتشفي إن الحل موجود، لكن سعره مرتفع، أو معقد، أو مش بيحل المشكلة بالكامل. الفكرة مش إنك تخترعي حاجة جديدة، لكن إنك تلاقي طريقة أفضل لحل مشكلة موجودة بالفعل.

    2. Hamsa Mansour Mohamed

      ردًّا على Mohamed Hassan

      تمام كده أنا فهمت يعني احاول احسن من ال Solutions بدل ما أعيد اختراع العجله من أولها واحاول احسن جوده بحيث ان اوصل ل احسن حاجه ترضي العملاء كلهم

  2. Mahmoud Adel فريق مونسترزجيت

    Helpful Thank you.